امریکی فوج کے ایران پر شدید حملے، خارک جزیرہ اور فوجی اہداف تباہ کردیا: صدر ٹرمپ

امریکی صدر ڈونلڈ ٹرمپ نے دعویٰ کیا ہے کہ امریکی افواج نے ایران کے خارک جزیرے اور دیگر فوجی اہداف پر انتہائی شدید حملے کیے ہیں۔

صدر ڈونلڈ ٹرمپ نے سماجی رابطے کی سائٹ پر جاری بیان میں کہا کہ ان کی ہدایت پر امریکی مرکزی کمان نے ایران کے اہم فوجی اہداف کو نشانہ بنایا اور اس کارروائی میں تمام اہداف کو مکمل طور پر تباہ کر دیا گیا۔

انہوں نے کہا کہ بعض وجوہات کے باعث خارک جزیرے کے تیل کے بنیادی ڈھانچے کو نشانہ نہیں بنایا گیا تاہم اگر آبنائے ہرمز میں جہاز رانی میں مداخلت کی گئی تو اس فیصلے پر فوری نظر ثانی کی جا سکتی ہے۔

صدر ٹرمپ کے مطابق انہوں نے اپنے دورِ صدارت میں امریکی فوج کو دنیا کی سب سے طاقتور قوت بنا دیا ہے اور ایران کے پاس ایسی کوئی صلاحیت موجود نہیں جو امریکی حملوں کا مؤثر دفاع کر سکے۔

انہوں نے کہا کہ ایران کو کبھی بھی جوہری ہتھیار حاصل کرنے کی اجازت نہیں دی جائے گی اور ایران کو امریکا، مشرقِ وسطیٰ یا عالمی امن کے لیے خطرہ نہیں بننے دیا جائے گا۔

امریکی صدر کا کہنا تھا کہ ایران کے خطے پر غلبے اور اسرائیل کو مکمل طور پر تباہ کرنے کے منصوبے اب ختم ہو چکے ہیں۔

انہوں نے ایران کی فوج اور حکومت سے وابستہ افراد کو خبردار کیا کہ وہ ہتھیار ڈال دیں اور مزید تباہی سے اپنے ملک کو بچائیں۔

یاد رہے کہ خارک جزیرہ ایران کے ساحل سے تقریباً پچیس کلو میٹر دور واقع ہے اور ایران کی زیادہ تر تیل برآمدات اسی جزیرے کے ذریعے عالمی منڈی تک پہنچتی ہیں۔