امریکی ویزا بانڈ پروگرام کے حوالے سے اہم فیصلہ

امریکی محکمہ خارجہ نے ویزا قوانین پر عملدرآمد کو سخت بناتے ہوئے ‘ویزا بانڈ پروگرام’ کو مستقل کرنے کا حتمی فیصلہ کر لیا ہے۔ اس نئے قانون کے تحت 50 مختلف ممالک سے تعلق رکھنے والے درخواست گزاروں کو ویزا کے حصول کے لیے 20 ہزار ڈالر تک کا بانڈ جمع کروانا ہوگا۔

غیر ملکی خبر رساں ایجنسی کی رپورٹ کے مطابق یہ نیا اصول کاروباری (B1) اور سیاحتی (B2) مقاصد کے لیے ویزا حاصل کرنے والے افراد پر لاگو ہوگا۔ امریکی حکام کا کہنا ہے کہ 2025 کے پائلٹ پروگرام کے نتائج سے یہ بات ثابت ہوئی ہے کہ ویزا قوانین کی پاسداری کو یقینی بنانے کے لیے یہ طریقہ کار انتہائی موثر ہے۔ نئے قانون میں پرانے پائلٹ پروگرام کے 5 ہزار ڈالر والے آپشن کو ختم کر کے رقم کی حد 5 ہزار، 10 ہزار، 15 ہزار سے بڑھا کر 20 ہزار ڈالر تک کر دی گئی ہے۔

حکام کے مطابق اس سخت پالیسی کا بنیادی مقصد ویزا کی مدت ختم ہونے کے بعد بھی امریکا میں غیر قانونی طور پر مقیم رہنے والے افراد کی حوصلہ شکنی کرنا ہے۔ اس پروگرام سے متاثر ہونے والے 50 ممالک میں سے 30 کا تعلق برِاعظم افریقہ سے ہے۔

یہ نیا قانون 3 اگست کو فیڈرل رجسٹر میں باضابطہ شائع ہوتے ہی نافذ العمل ہو جائے گا۔ واضح رہے کہ امریکا نہ صرف غیر قانونی امیگریشن کو روکنے کے لیے سخت اقدامات کر رہا ہے بلکہ قانونی تارکینِ وطن کے لیے بھی قوانین مزید سخت کیے جا رہے ہیں، جن میں اضافی فیسوں کا نفاذ اور سوشل میڈیا کی کڑی جانچ پڑتال شامل ہے۔