امریکا اور سعودی کمپنیوں کے درمیان 270 ارب ڈالرز کے معاہدے

امریکی صدر ڈونلڈ ٹرمپ نے اعلان کیا ہے کہ امریکا اور سعودی عرب کی مختلف کمپنیوں کے درمیان 270 ارب ڈالرز کے کاروباری معاہدوں پر دستخط ہو گئے ہیں۔

امریکا سعودی بزنس فورم سے خطاب میں صدر ٹرمپ نے کہا کہ امریکا اب دنیا کی سب سے کامیاب معیشت بن چکا ہے۔ انہوں نے سعودی ولی عہد محمد بن سلمان کی تعریف کرتے ہوئے کہا کہ وہ ایک مضبوط اور جرات مند رہنما ہیں اور امریکا اور سعودی عرب کے درمیان تعلقات پہلے سے کہیں زیادہ مستحکم ہو چکے ہیں۔

صدر ٹرمپ نے کہا کہ آج درجنوں کمپنیوں کے ساتھ یہ معاہدے کیے گئے ہیں، اور امریکا اور سعودی عرب کی شراکت داری مضبوط ہے۔ انہوں نے مزید کہا کہ سعودی عرب ہمارا سب سے بڑا نان نیٹو اتحادی ہے۔ اس موقع پر صدر ٹرمپ نے ولی عہد محمد بن سلمان کے اعزاز میں عشائیہ بھی دیا۔

واضح رہے کہ شہزادہ محمد بن سلمان اس وقت امریکا کے دورے پر ہیں۔