ایران پر ایک اور حملے کیلئے تیار، نئی مہم زیادہ دیر تک جاری نہیں رہے گی: صدر ٹرمپ

امریکی صدر ڈونلڈ ٹرمپ نے وائٹ ہاؤس میں میڈیا سے گفتگو کرتے ہوئے ایران پر مزید حملوں کا اشارہ دیا ہے اور آبنائے ہرمز پر مکمل کنٹرول کا دعویٰ کیا ہے۔ صدر ٹرمپ کا کہنا تھا کہ امریکہ ایران پر ایک اور حملے کے لیے مکمل تیار ہے تاہم ایران کے خلاف نئی مہم زیادہ دیر تک جاری نہیں رہے گی۔ انہوں نے کہا کہ ایرانی حکومت وقت کے ساتھ کمزور ہو رہی ہے اور امریکہ خطے میں حیرت انگیز نتائج حاصل کر رہا ہے۔ امریکی صدر نے واضح کیا کہ ایران کو ہرگز جوہری ہتھیار حاصل نہیں کرنے دیے جائیں گے کیونکہ وہ اپنے ریڈار اور میزائل سسٹم کو دوبارہ بنانے کی کوشش کر رہا تھا۔ صدر ٹرمپ نے مزید دعویٰ کیا کہ ایران میں 65 ہزار مظاہرین ہلاک ہو چکے ہیں اور ایرانی عوام جلد اپنی حکومت کے جبر کے خلاف اٹھ کھڑے ہوں گے۔