امریکی صدر کا یمنی حوثیوں کے خلاف کارروائی سے پھر انکار

امریکی صدر ڈونلڈ ٹرمپ نے یمنی حوثیوں کے خلاف براہِ راست عسکری کارروائی سے انکار کرتے ہوئے امریکی فوج کو تمام تر ترجیحات ایران اور آبنائے ہرمز کی صورتِ حال پر مرکوز رکھنے کی ہدایت کی ہے۔ امریکی نیوز ویب سائٹ ’ایگزیوس‘ (Axios) کی رپورٹ کے مطابق سعودی ولی عہد شہزادہ محمد بن سلمان اور امریکی صدر ڈونلڈ ٹرمپ کے درمیان ایک ہی روز میں دو بار ٹیلیفونک رابطہ ہوا، جس میں سعودی ولی عہد نے امریکا سے یمنی حوثیوں پر باقاعدہ حملے کرنے کی درخواست کی تھی۔

رپورٹ میں مزید انکشاف کیا گیا ہے کہ امریکی سینٹرل کمانڈ (CENTCOM) کے سربراہ ایڈمرل بریڈ کوپر نے سعودی عرب کا دورہ کر کے اہم ملاقاتیں کی ہیں۔ ان ملاقاتوں میں طے پایا کہ اگرچہ امریکا حوثیوں کے خلاف خود براہِ راست فضائی کارروائی میں حصہ نہیں لے گا، تاہم وہ سعودی عرب کو حوثیوں سے متعلق انٹیلی جنس معلومات (Intelligence Sharing) فراہم کرتا رہے گا۔ امریکی حکام کا کہنا ہے کہ پینٹاگون اس وقت صرف بحیرہ احمر میں تجارتی جہاز رانی کی آزادانہ آمدورفت اور تحفظ یقینی بنانے پر توجہ مرکوز کیے ہوئے ہے۔