ایران کا بہت نقصان ہورہاہے، فضائی دفاعی نظام مفلوج ہوچکاہے، امریکی صدرکادعویٰ

امریکی صدر ڈونلڈ ٹرمپ نے دعویٰ کیا ہے کہ ایران کا بہت نقصان ہو رہا ہے۔ٹروتھ سوشل پرپوسٹ میں امریکی صدر کا کہنا تھا کہ میڈیا کو یہ کہنا پسند ہے کہ ایران جیت رہا ہے جب حقیقت یہ ہے کہ وہ ہار رہے ہیں اور بُری طرح ہار رہے ہیں۔

صدر ٹرمپ نے اپنے دعوؤں کو دہراتے ہوئے کہا کہ ایران کی بحریہ اور فضائیہ ختم ہو چکی ہے اور ان کا فضائی دفاعی نظام بھی مفلوج ہو چکا ہے۔ ریڈار تباہ ہو گئے ہیں۔

اُنہوں نے یہ دعویٰ بھی کیا کہ ایران کے میزائل پروگرام، ڈرون فیکٹریاں اور ڈرونز کو ختم کر دیا گیا ہے اور سب سے اہم بات یہ ہے کہ ان کے بڑے رہنما مارے جا چکے ہیں۔

ایران کی جانب سمندر میں بارودی سرنگیں بچھائے جانے کا ذکر کرتے ہوئے امریکی صدر کا کہنا تھا کہ امریکا اب دُنیا بھر کے ممالک کے حق میں آبنائے ہرمز کو صاف کرنا شروع کر رہا ہے۔