امریکہ بین الاقوامی قانون کا احترام کرے، فوجی کارروائی تشویشناک ہے: اقوام متحدہ

اقوام متحدہ کے سیکرٹری جنرل نے وینزویلا میں حالیہ کشیدگی میں اضافے، بالخصوص امریکا کی جانب سے کی گئی فوجی کارروائی پر گہری تشویش کا اظہار کیا ہے۔

نیویارک سے جاری بیان میں سیکرٹری جنرل نے خبردار کیا کہ اس پیش رفت کے خطے پر تشویشناک اثرات مرتب ہو سکتے ہیں اور وینزویلا کی صورتحال سے قطع نظر ایسی فوجی کارروائیاں ایک خطرناک نظیر قائم کرتی ہیں۔

انہوں نے تمام فریقین پر زور دیا کہ وہ بین الاقوامی قانون، خصوصاً اقوام متحدہ کے چارٹر کا مکمل احترام کریں۔ سیکرٹری جنرل کے مطابق حالیہ پیش رفت میں بین الاقوامی قوانین کے بنیادی اصولوں کی پاسداری نہ ہونا عالمی قانونی نظام کے لیے نقصان دہ ہے۔

اقوام متحدہ کے سربراہ نے وینزویلا کے تمام فریقین سے مطالبہ کیا کہ انسانی حقوق اور قانون کی حکمرانی کے احترام کے ساتھ جامع اور بامقصد مذاکرات کا راستہ اپنایا جائے تاکہ بحران کا پرامن حل ممکن بنایا جا سکے۔

یہ بیان ایسے وقت میں سامنے آیا ہے جب وینزویلا میں سیاسی اور عسکری صورتحال تیزی سے کشیدہ ہو رہی ہے اور عالمی برادری اس کے ممکنہ علاقائی اثرات پر گہری نظر رکھے ہوئے ہے۔