امریکی فوج نے آبنائے ہرمز کی ناکہ بندی شروع کر دی: عرب میڈیا

مشرقِ وسطیٰ میں کشیدگی نے اس وقت خطرناک رخ اختیار کر لیا جب عرب میڈیا نے رپورٹ کیا کہ امریکی فوج نے عالمی تجارت کے لیے اہم ترین آبی گزرگاہ آبنائے ہرمز کی باقاعدہ ناکہ بندی شروع کر دی ہے۔ امریکی سینٹرل کمانڈ (CENTCOM) کے مطابق، اس ناکہ بندی کا عارضی نفاذ ایرانی بندرگاہوں کی جانب جانے والے اور وہاں سے آنے والے تمام بحری جہازوں پر ہوگا۔ اس اقدام کے تحت خلیجِ عرب اور خلیجِ عمان میں واقع ایرانی پورٹس کی نقل و حرکت کو مکمل طور پر مفلوج کر دیا گیا ہے، جس کا مقصد ایران کی سمندری تجارت کو روکنا ہے۔

اس عسکری کارروائی سے قبل امریکی صدر ڈونلڈ ٹرمپ نے ایک جارحانہ بیان جاری کرتے ہوئے کہا تھا کہ اب ایران اپنا تیل نہیں بیچ سکے گا کیونکہ امریکہ آبنائے ہرمز کو مکمل طور پر بند کر رہا ہے۔ انہوں نے دعویٰ کیا کہ امریکی فورسز نے ایرانی بحریہ کو بھاری نقصان پہنچایا ہے اور ان کے 158 بحری بیڑے تباہ کر دیے گئے ہیں۔ صدر ٹرمپ کا کہنا تھا کہ ایران نے آبنائے ہرمز کھولنے کا وعدہ کر کے جھوٹ بولا، جس کے بعد اب امریکہ اپنی توانائی کی خود کفالت (روس اور سعودی عرب سے زیادہ تیل ہونے) کے بل بوتے پر ایران پر دباؤ بڑھا رہا ہے۔

صدر ٹرمپ نے مزید واضح کیا کہ وہ کسی بھی صورت ایران کو ایٹمی صلاحیت حاصل نہیں کرنے دیں گے اور موجودہ ناکہ بندی اسی سلسلے کی ایک کڑی ہے۔ ماہرین کا کہنا ہے کہ آبنائے ہرمز کی ناکہ بندی سے نہ صرف ایران کی معیشت تباہ ہونے کا خدشہ ہے بلکہ عالمی منڈی میں توانائی کا سنگین بحران پیدا ہو سکتا ہے۔ ایران نے پہلے ہی خبردار کر رکھا ہے کہ اس کی سمندری حدود میں کسی بھی مداخلت کا منہ توڑ جواب دیا جائے گا، جس کے باعث خطے میں ایک بڑی تباہ کن جنگ کے خطرات منڈلا رہے ہیں۔