ایران جنگ میں امریکی فوجیوں کی ہلاکتیں پینٹاگون کے اعدادو شمار سے زیادہ ہونے کا انکشاف

امریکی معروف اخبار ‘واشنگٹن پوسٹ’ کی ایک تحقیقاتی رپورٹ میں انکشاف ہوا ہے کہ ایران کے خلاف جاری حالیہ معرکے میں امریکی فوجیوں کی ہلاکتیں پینٹاگون (امریکی وزارتِ دفاع) کے جاری کردہ سرکاری اعداد و شمار سے کہیں زیادہ ہیں۔ رپورٹ کے مطابق ایران کے ساتھ جنگی کارروائیوں کے دوران اب تک کم از کم 22 امریکی فوجی ہلاک ہو چکے ہیں، جبکہ دوسری جانب پینٹاگون کی جانب سے اب تک صرف 18 امریکی اہلکاروں کی ہلاکت کا باضابطہ اعتراف کیا گیا ہے۔

تحقیقاتی رپورٹ میں بتایا گیا ہے کہ جنگ کے دوران مارے جانے والے مزید 4 امریکی فوجیوں کی ہلاکتیں پینٹاگون کے سرکاری ریکارڈ کا حصہ نہیں بنائی گئیں۔ ایک سینئر امریکی عہدیدار نے نام نہ ظاہر کرنے کی شرط پر بتایا کہ ہلاکتوں کی حقیقی تعداد 23 تک ہو سکتی ہے۔ واشنگٹن پوسٹ نے مزید انکشاف کیا ہے کہ اس تنازع کے دوران خطے میں 3 امریکی ملٹری کنٹریکٹرز بھی اپنی جانوں سے ہاتھ دھو بیٹھے ہیں، جس سے ظاہر ہوتا ہے کہ امریکی وزارتِ دفاع جانی نقصان کے اصل اعداد و شمار چھپانے کی کوشش کر رہی ہے۔