امریکی ریاست ٹیکساس میں فوجی ہیلی کاپٹر گر کر تباہ، 2 افراد ہلاک

امریکی ریاست ٹیکساس کے شہر سلاڈو کے قریب ایک فوجی ہیلی کاپٹر گر کر تباہ ہو گیا جس کے نتیجے میں اس میں سوار دو افراد موقع پر ہی ہلاک ہو گئے۔ فوجی حکام کے مطابق حادثہ اتنا شدید تھا کہ ہیلی کاپٹر زمین سے ٹکراتے ہی اس میں بڑے پیمانے پر خوفناک آگ بھڑک اٹھی۔

امریکی ملٹری حکام نے تصدیق کی ہے کہ حادثے کا شکار ہونے والا طَیارہ ‘اے ایچ-64 اپاچی’ (AH-64 Apache) حملے آور فوجی ہیلی کاپٹر تھا۔ حادثے کی اطلاع ملتے ہی امدادی ٹیمیں اور سیکیورٹی اہلکار فوری طور پر جائے وقوعہ پر پہنچ گئے اور علاقے کو گھیرے میں لے لیا۔

واقعے کے فوراً بعد فورٹ ہُڈ کرمنل انویسٹی گیشن ڈویژن نے حادثے کی وجوہات کا تعین کرنے کے لیے باقاعدہ تحقیقات کا آغاز کر دیا ہے۔ ملٹری حکام کا کہنا ہے کہ ہیلی کاپٹر کے تباہ ہونے کی فوری اور اصل وجہ تاحال سامنے نہیں آ سکی ہے اور تحقیقاتی رپورٹ مکمل ہونے کے بعد ہی مزید تفصیلات جاری کی جائیں گی۔