امریکا کا ایرانی جزیرے خارگ سے تیل کی ترسیل مکمل رکنے کا دعویٰ

امریکی میڈیا نے دعویٰ کیا ہے کہ آبنائے ہرمز (Strait of Hormuz) کی بندش کے نتیجے میں ایران کے اہم ترین جزیرے خارگ (Kharg Island) سے خام تیل کی ترسیل اور برآمدات مکمل طور پر رک گئی ہیں۔

امریکی نشریاتی ادارے کی جانب سے جاری کردہ رپورٹ کے مطابق، جزیرہ خارگ ایرانی خام تیل کی بین الاقوامی مارکیٹ میں ترسیل کا سب سے بڑا اور بنیادی مرکز سمجھا جاتا ہے۔ تاہم تازہ ترین معلومات کے مطابق جزیرے پر واقع تینوں آئل ٹرمینلز مکمل طور پر خالی ہو چکے ہیں اور 31 جولائی کے بعد سے وہاں سے کوئی بھی آئل ٹینکر یا بحری جہاز تیل لے کر روانہ نہیں ہوا۔

رپورٹ میں مزید انکشاف کیا گیا ہے کہ جزیرہ خارگ سے خام تیل کی سب سے بڑی مقدار چین کو سپلائی کی جاتی ہے۔ لیکن آبنائے ہرمز کی مسدود صورتحال کے باعث گزشتہ دو ہفتوں سے اس جزیرے سے کسی بھی ملک کو تیل برآمد نہیں کیا جا سکا، جس کے باعث عالمی توانائی کی سپلائی چین پر شدید اثرات مرتب ہونے کا خدشہ ظاہر کیا جا رہا ہے۔