آبنائے ہرمز پر لڑائی کے باعث شیڈول امریکا ایران مذاکرات معطل

امریکا اور ایران کے درمیان آبنائے ہرمز میں جاری حالیہ لڑائی اور کشیدگی کے باعث سوئٹزرلینڈ میں رواں ہفتے شیڈول تکنیکی سطح کے مذاکرات معطل ہو گئے ہیں۔

وال اسٹریٹ جرنل کی رپورٹ کے مطابق، دونوں ممالک کے مابین حالیہ مفاہمتی یادداشت (MoU) پر دستخط کے بعد تکنیکی ٹیموں کے مذاکرات ہونا تھے اور فریقین نے اس سلسلے کو جاری رکھنے پر اتفاق کیا تھا، تاہم گزشتہ دو روز سے لگاتار ہونے والی جھڑپوں کے باعث یہ عمل کھٹائی میں پڑ گیا ہے۔ واضح رہے کہ مفاہمتی یادداشت کے باوجود آبنائے ہرمز میں کشیدگی کم نہیں ہو سکی اور دونوں ممالک ایک دوسرے پر حملے کر رہے ہیں۔حالیہ کشیدگی اس وقت مزید بڑھ گئی جب امریکی  صدر ڈونلڈ ٹرمپ کی ہدایات پر امریکی فوج نے ایرانی اہداف پر شدید فضائی حملے کیے۔ ان حملوں کے جواب میں ایرانی افواج نے کویت اور بحرین میں قائم امریکی فوجی تنصیبات پر میزائلوں اور ڈرونز سے جوابی کارروائی کی ہے۔ ایران نے امریکی فضائی کارروائی کو مفاہمتی یادداشت کی کھلی خلاف ورزی قرار دیا ہے۔

دوسری جانب امریکی صدر ڈونلڈ ٹرمپ نے ایران کو ایک بار پھر سنگین نتائج کی دھمکی دیتے ہوئے کہا ہے کہ اب مزید تحمل ممکن نہیں، اور ایسا نہ ہو کہ (ان اقدامات کے نتیجے میں) ایران کا وجود ہی باقی نہ رہے۔ ایرانی پاسدارانِ انقلاب (IRGC) نے بھی امریکی حملوں کی شدید مذمت کرتے ہوئے واضح کیا ہے کہ یہ کارروائی مفاہمتی معاہدے کی خلاف ورزی ہے اور آئندہ کسی بھی قسم کی جارحیت کا انتہائی سخت اور فیصلہ کن جواب دیا جائے گا۔