امریکا اور ایران کے درمیان مذاکرات ایک بار پھر ناکام

قطر کی ثالثی میں ہونے والے سفارتی مذاکرات ایک بار پھر ناکام ہو گئے ہیں اور دونوں فریقین کے درمیان کسی قسم کی پیشرفت سامنے نہیں آ سکی۔ امریکی نیوز ویب سائٹ ‘ایگزیوس’ نے مذاکرات سے باخبر تین ذرائع کے حوالے سے دعویٰ کیا ہے کہ امریکا اور ایران دونوں ہی اپنے اپنے مؤقف سے ایک انچ بھی پیچھے ہٹنے کو تیار نہیں ہیں، جس کے بعد دونوں ممالک کے درمیان ایک بار پھر جنگ کے خدشات میں اضافہ ہو گیا ہے۔

رپورٹ کے مطابق، امریکی صدر ڈونلڈ ٹرمپ رواں سال ملک میں ہونے والے مڈٹرم الیکشنز کے بعد ایران کے خلاف کسی بڑی فوجی کارروائی کا حکم دے سکتے ہیں۔ نیویارک میں ہونے والے ان مذاکرات کے دوران قطری ثالثوں نے ایرانی وزیرِ خارجہ اور ان کی ٹیم کے ساتھ کئی گھنٹے طویل مشاورتی سیشنز کیے۔

بات چیت کے دوران قطر کی جانب سے ایک دو صفحات پر مشتمل سمجھوتے کی خصوصی تجویز بھی پیش کی گئی جس پر فریقین نے غور کیا؛ اس قطری تجویز میں ایران کی مبینہ ناکہ بندی ختم کرنے اور اس کے جوہری پروگرام میں ٹھوس رعایتیں دینے جیسے مطالبات شامل تھے۔ تاہم، ایگزیوس کے مطابق جہاں ایک طرف وائٹ ہاؤس ان مذاکرات میں کسی پیشرفت کے حوالے سے کافی پرامید تھا، وہیں واشنگٹن کا یہ بھی ماننا ہے کہ موجودہ زمینی صورتحال میں اسے فی الحال کسی سمجھوتے کی ضرورت نہیں ہے۔