صدر ٹرمپ ایران کے معاملے میں طاقت کے استعمال سے گریز نہیں کریں گے: وائٹ ہاؤس

واشنگٹن: وائٹ ہاؤس نے اعلان کیا ہے کہ امریکی صدر ڈونلڈ ٹرمپ کی ایران کے معاملے میں ترجیح ہمیشہ سفارتکاری رہی ہے، تاہم ضرورت پڑنے پر وہ فوجی طاقت کے استعمال سے بھی گریز نہیں کریں گے۔

ترجمان وائٹ ہاؤس کیرولین لیویٹ نے کہا کہ ایران کے معاملات میں حتمی فیصلہ امریکی صدر کے اختیار میں ہے۔

امریکی محکمہ خارجہ کے مطابق وزیر خارجہ مارکو روبیو آج کانگریس کی اہم قیادت کو ایران کے حوالے سے موجودہ صورتحال پر بریفنگ دیں گے۔ رائٹرز کے ایک باخبر ذرائع نے بتایا کہ وہ قانون سازوں کو ایران کی تازہ پیش رفت سے آگاہ کریں گے۔

صدر ٹرمپ نے 19 فروری کو ایران کو مذاکرات کے لیے 10 سے 15 دن کی مہلت دی تھی۔ امکان ظاہر کیا جا رہا ہے کہ کانگریس سے خطاب کے دوران وہ ایران کے جوہری پروگرام اور ممکنہ فوجی کارروائی کے حوالے سے اپنا موقف بھی پیش کریں گے۔

تجزیہ کاروں کا کہنا ہے کہ یہ صورتحال خطے میں کشیدگی میں اضافے کا باعث بن سکتی ہے اور عالمی سکیورٹی اور اقتصادی حالات پر بھی اس کے اثرات مرتب ہو سکتے ہیں۔