ایران جنگ کے 100 دن مکمل، عالمی معیشت، تجارت اور سیاست شدید دباؤ کا شکار

امریکا اور اسرائیل کی جانب سے ایران کے خلاف شروع کی گئی جنگ کو 100 دن مکمل ہو گئے ہیں، تاہم صورتحال میں بہتری کے بجائے کشیدگی میں اضافہ دیکھا جا رہا ہے۔

جنگ کے آغاز میں امریکی قیادت کی جانب سے جلد اختتام کے دعوے کیے گئے تھے، مگر 100 دن گزرنے کے باوجود نہ صرف خطے میں تنازع برقرار ہے بلکہ اس کے اثرات عالمی معیشت اور سفارتی تعلقات تک پھیل چکے ہیں۔

اعداد و شمار کے مطابق ہزاروں افراد ہلاک ہو چکے ہیں جبکہ لبنان اور ایران میں بڑے پیمانے پر نقل مکانی دیکھی گئی ہے۔ جنگ کے نتیجے میں کئی علاقوں میں بنیادی ڈھانچہ متاثر ہوا اور انسانی بحران سنگین ہو گیا ہے۔

آبنائے ہرمز میں تجارتی سرگرمیوں میں غیر معمولی کمی نے عالمی توانائی منڈی کو متاثر کیا ہے، جس کے باعث تیل اور گیس کی قیمتوں میں اضافہ دیکھا گیا ہے۔

عالمی سطح پر مہنگائی میں اضافہ، خوراک اور ایندھن کی قیمتوں میں اتار چڑھاؤ اور اسٹاک مارکیٹوں میں عدم استحکام اس جنگ کے اہم معاشی اثرات کے طور پر سامنے آئے ہیں۔

سفارتی سطح پر پاکستان سمیت مختلف ممالک کی کوششوں کے باوجود فریقین کے درمیان مکمل معاہدہ تاحال ممکن نہیں ہو سکا، جبکہ تجزیہ کار اسے اعتماد کے بحران سے جوڑ رہے ہیں۔