امریکا کے مسلسل دسویں رات حملے، ایران کی کویت اور بحرین میں جوابی کارروائی

امریکہ اور ایران کے درمیان کشیدگی شدید ترین مرحلے میں داخل ہو گئی ہے، جہاں امریکی فوج (CENTCOM) نے مسلسل دسویں رات ایران کے فوجی کمانڈ سینٹرز، میزائل و ڈرون سائٹس اور ایئر ڈیفنس سسٹمز پر بمباری کا دعویٰ کیا ہے۔ اس کے جواب میں ایرانی پاسدارانِ انقلاب نے بحرین اور کویت میں قائم امریکی فوجی تنصیبات، بشمول علی السالم ایئر بیس اور رفاع میں نصب پیٹریوٹ سسٹمز کو میزائلوں اور ڈرونز سے نشانہ بنانے کا دعویٰ کیا ہے۔ ایرانی میڈیا کے مطابق اصفہان، چابہار اور بندر عباس سمیت مختلف علاقوں میں دھماکوں کی آوازیں سنی گئیں، جبکہ پاسدارانِ انقلاب نے کرمان کی فضاؤں میں ایک امریکی کروز میزائل تباہ کرنے کا بھی اعلان کیا۔ دوسری جانب آبنائے ہرمز میں کشیدگی کے باعث دو آئل ٹینکرز میں دھماکے کی اطلاعات سامنے آئی ہیں، تاہم کویتی فوج کا کہنا ہے کہ ان کا فضائی دفاعی نظام ایرانی میزائلوں اور ڈرونز کو فضا ہی میں ناکارہ بنا رہا ہے