امریکا اور حوثیوں کے درمیان عمان میں خفیہ ملاقات کا انکشاف

امریکی حکام اور یمن کے حوثی باغیوں کے نمائندوں کے درمیان سلطنتِ عمان کے دارالحکومت مسقط میں ایک اہم خفیہ ملاقات کا انکشاف ہوا ہے۔ عالمی خبر رساں ایجنسی ‘رائٹرز’ کی رپورٹ کے مطابق اس خفیہ مذاکراتی نشست میں حوثیوں نے امریکی حکام کو مسقط میں ہونے والی بات چیت کے دوران بحیرہ احمر اور ملحقہ سمندری راستوں پر امریکی بحری جہازوں پر مزید حملے نہ کرنے کی باضابطہ یقین دہانی کرائی ہے، جبکہ 2025ء کے جنگ بندی معاہدے پر قائم رہنے کے عزم کا بھی اظہار کیا ہے۔

خبر رساں ادارے کے مطابق حوثی رہنماؤں نے امریکی وفد کو یہ بھی باور کرایا کہ وہ اب اسرائیلی بحری جہازوں یا اسرائیل سے متعلقہ تجارتی جہازوں کو بھی نشانہ نہیں بنائیں گے۔ رپورٹ میں بتایا گیا ہے کہ حوثیوں اور امریکی حکام کے درمیان یہ اہم ملاقات رواں ہفتے کے آغاز میں مسقط میں واقع امریکی سفارت خانے کے اندر ہوئی، جس میں حوثی ملیشیا کے چند اہم اعلیٰ سطح کے رہنماؤں نے شرکت کی۔ عمان کی حکومت نے ان حساس مذاکرات کے انعقاد کو ممکن بنانے اور دونوں فریقین کے درمیان رابطہ کرانے میں کلیدی ثالث کا کردار ادا کیا، جبکہ امریکی وفد کی قیادت مسقط میں امریکی سفارت خانے کے تجربہ کار اہلکار کر رہے تھے۔