ٹرمپ انتظامیہ کا ایران کیخلاف فوری نئے حملوں کا ارادہ نہیں: امریکی میڈیا

امریکی نیوز ویب سائٹ ‘ایگزیوس’ نے اپنی رپورٹ میں دعویٰ کیا ہے کہ امریکا فی الحال ایران کے خلاف فوری نئے فوجی حملے کرنے کا ارادہ نہیں رکھتا، بلکہ وہ نئی اقتصادی پابندیوں کے ذریعے تہران پر دباؤ بڑھانے کی پالیسی پر توجہ مرکوز کر رہا ہے۔ رپورٹ کے مطابق آبنائے ہرمز میں بارودی سرنگوں کی صفائی اور بحری جہازوں کی آمدورفت شروع ہونے سے ایران پر دباؤ میں کمی آئی ہے، جبکہ واشنگٹن کی کوشش ہے کہ آبنائے ہرمز کے ذریعے زیادہ سے زیادہ تیل عالمی منڈیوں تک پہنچایا جائے۔ امریکی حکام کا کہنا ہے کہ بحری ناکہ بندی کے باعث ایران کی تیل کی برآمدات تقریباً رک چکی ہیں، اسی لیے فی الوقت واشنگٹن تہران سے مذاکرات کے بجائے اس پر معاشی اور سفارتی دباؤ بڑھانے کی حکمت عملی اختیار کیے ہوئے ہے۔