غیرملکیوں کے ویزوں کی میعاد میں کمی، امریکی عدالت نے ٹرمپ انتظامیہ کا نیا قانون روک دیا

امریکی وفاقی جج نے صدر ڈونلڈ ٹرمپ کی انتظامیہ کی جانب سے غیر ملکی طلبہ، محققین اور صحافیوں کے لیے امریکہ میں قیام کی مدت محدود کرنے کے نئے قانون کے نفاذ کو روک دیا ہے۔ بوسٹن کی وفاقی عدالت کے جج ایس ڈینس سیلر نے جامعات اور مختلف یونینز کے اتحاد کے حق میں فیصلہ دیتے ہوئے کہا کہ محکمہ ہوم لینڈ سیکیورٹی (DHS) نے یہ پالیسی انتہائی کمزور اور غیر معقول جواز کی بنیاد پر مرتب کی ہے اور اس سے ممکنہ معاشی نقصان اور متبادل حل کا جائزہ نہیں لیا گیا۔

سابق امریکی صدر جارج ڈبلیو بش کے دور میں مقرر کیے گئے جج ڈینس سیلر نے اپنے فیصلے میں لکھا کہ یہ قانون گزشتہ 50 سال سے قائم اس نظام کو ختم کر دے گا جس کے تحت غیر ملکی طلبہ کو تعلیمی دورانیے تک امریکہ میں قیام کی اجازت ملتی ہے۔ نئے قانون میں طلبہ (F) اور تبادلۂ ثقافت (J) ویزوں کی مدت زیادہ سے زیادہ چار سال جبکہ صحافیوں (I) کے ویزے کی مدت صرف 240 روز تک محدود کی گئی تھی۔ جج نے واضح کیا کہ اس فیصلے سے ہارورڈ اور ایم آئی ٹی جیسی نامور جامعات کو شدید مالی نقصان ہوگا اور امریکی معیشت، سائنس و ٹیکنالوجی اور تعلیمی نظام پر تباہ کن اثرات مرتب ہوں گے۔