جدید ترین امریکی لڑاکا طیارے F-35 کے حساس پرزے چین کے ہاتھ لگ گئے

امریکی میڈیا کی رپورٹس کے مطابق پینٹاگون اور امریکی کانگریس نے اس بات کی اعلیٰ سطحی تحقیقات شروع کر دی ہیں کہ امریکہ کے سب سے جدید F-35 اسٹیلتھ لڑاکا طیارے کے حساس پرزے کس طرح پراسرار طور پر چین کے ہاتھ لگ گئے۔ ذرائع کے مطابق یہ پرزے—جن میں طیارے کی ‘کاک پٹ کینوپی’ اور ‘ویپنز-بے ڈور’ شامل تھے—آسٹریلین ایئر فورس کی جانب سے معائنے اور مرمت کے لیے بین الاقوامی کوریئر کمپنی ‘یو پی ایس’ (UPS) کے ذریعے امریکہ بھیجے جا رہے تھے۔ ان حصوں پر رڈار کی لہروں کو جذب کرنے والا انتہائی حساس کیمیائی مواد (Stealth Coating) لگا ہوا تھا جو اس طیارے کو رڈار کی نظروں سے اوجھل رکھنے میں کلیدی کردار ادا کرتا ہے۔

ترسیل کے دوران لاجسٹک فلائٹ امریکہ جانے کے بجائے جنوبی کوریا میں رکی اور وہاں سے راستے کی پراسرار تبدیلی کے بعد ہانگ کانگ پہنچ گئی۔ جہاں چینی حکام نے سیکیورٹی خدشات کی بنیاد پر ان پرزوں کو فوری طور پر اپنے قبضے میں لے لیا اور متعدد سفارتی و قانونی تقاضوں کے باوجود انہیں واپس کرنے سے انکار کر دیا ہے۔ امریکی محکمہ دفاع (پینٹاگون) نے واقعے کی تصدیق کرتے ہوئے کہا ہے کہ وہ پرزوں کی بازیابی اور مستقبل میں اس قسم کی سیکیورٹی نااہلی کی روک تھام کے لیے تحقیقاتی اداروں کے ساتھ مل کر اقدامات کر رہا ہے، جبکہ امریکی کانگریس کی دو کمیٹیاں یہ معلوم کرنے کی کوشش کر رہی ہیں کہ یہ محض ترسیل کی غلطی تھی یا کسی بین الاقوامی جاسوسی کا نتیجہ۔