کیلیفورنیا میں امریکی ایف-35 بی جنگی طیارہ حادثے کا شکار، پائلٹ محفوظ

امریکی ریاست کیلیفورنیا میں جدید ترین فضائی ٹیکنالوجی سے لیس ایف-35 بی (F-35B Lightning II) لڑاکا طیارہ پرواز کے دوران حادثے کا شکار ہو کر تباہ ہو گیا۔ حادثہ میرین کور ایئر سٹیشن پر لینڈنگ سے چند لمحے قبل پیش آیا۔

امریکی میرین کور کے مطابق، حادثے کے وقت پائلٹ نے فوری ردعمل دیتے ہوئے ایجکیشن سیٹ کے ذریعے خود کو محفوظ طریقے سے باہر نکال لیا۔ پائلٹ کو معمولی چوٹیں آئی ہیں اور طبی امداد کے لیے قریبی ہسپتال منتقل کر دیا گیا ہے جہاں اس کی حالت تسلی بخش بتائی جاتی ہے۔ واقعے کے فوراً بعد ریسکیو اور فائر فائٹنگ ٹیموں نے موقع پر پہنچ کر طیارے کے ملبے اور اردگرد خشک گھاس میں لگنے والی آگ پر قابو پا لیا۔

حادثے کی اصل وجوہات جاننے کے لیے امریکی فوج نے باقاعدہ تحقیقات کا آغاز کر دیا ہے۔ واضح رہے کہ ایف-35 بی کی قیمت تقریباً 102 ملین امریکی ڈالر ہے اور یہ دنیا کے ان چند جدید ترین اسٹیلتھ طیاروں میں شمار ہوتا ہے جو عمودی لینڈنگ اور مختصر رن وے سے پرواز کی صلاحیت رکھتے ہیں۔