سعودیہ میں امریکی سفارتخانے پر حملے پر مارکو روبیو کا جھوٹ بے نقاب

امریکی میڈیا نے ریاض میں واقع امریکی سفارتخانے پر حملے کی تفصیلات جاری کرتے ہوئے دعویٰ کیا ہے کہ ہونے والا نقصان سرکاری بیانات سے کہیں زیادہ ہے۔

رپورٹس کے مطابق ایک ایرانی ڈرون امریکی سفارتخانہ کی عمارت سے ٹکرایا جس سے عمارت میں بڑا سوراخ ہو گیا، جبکہ ایک منٹ بعد دوسرا ڈرون بھی اسی مقام پر آ ٹکرایا، جس سے محفوظ ترین حصے بھی متاثر ہوئے۔ حملے کے نتیجے میں لگنے والی آگ کو بجھانے میں کئی گھنٹے لگے۔

امریکی میڈیا کے مطابق مارکو روبیو کی جانب سے نقصان کے حوالے سے دی گئی معلومات مکمل طور پر درست نہیں تھیں، جبکہ سفارتخانے کی عمارت کے تین فلورز شدید متاثر ہوئے اور ایک حساس سکیورٹی سیکشن کو بھی نشانہ بنایا گیا۔

رپورٹس میں یہ بھی بتایا گیا ہے کہ بعد ازاں مزید ڈرون حملے کیے گئے جنہیں میزائل دفاعی نظام کے ذریعے روکا گیا، جبکہ ایک ڈرون قریبی امریکی سفارتکار کی رہائش گاہ کو نشانہ بنانے کے قریب پہنچ گیا تھا۔

سابق سی آئی اے اہلکار برنارڈ ہڈسن نے کہا کہ یہ حملہ ظاہر کرتا ہے کہ حملہ آور ریاض میں اہم اہداف کو نشانہ بنانے کی صلاحیت رکھتے ہیں، جبکہ پرنس سلطان ایئر بیس پر بھی حملے کی اطلاعات سامنے آئی ہیں۔

دوسری جانب پاسدارانِ انقلاب نے اس حملے میں ملوث ہونے کی تردید کرتے ہوئے کہا ہے کہ یہ کارروائی ممکنہ طور پر اسرائیلی حکمت عملی کا حصہ ہو سکتی ہے۔

پاسداران انقلاب کے مطابق خطے میں بڑھتی کشیدگی کے تناظر میں مسلم ممالک کو محتاط رہنے کی ضرورت ہے، جبکہ امریکی و صہیونی اتحاد کو خطے میں عدم استحکام کا ذمہ دار قرار دیا گیا ہے۔