ایران سے ممکنہ جنگ کا خدشہ، امریکا نے خلیجی ممالک میں دفاعی نظام بڑھا دیا

امریکہ نے مشرقِ وسطیٰ میں کشیدگی کے پیشِ نظر اپنے خلیجی اتحادیوں سعودی عرب اور قطر میں مزید دو ‘پیٹریاٹ’ میزائل دفاعی بیٹریاں (Patriot Missile Defense Batteries) تعینات کر دی ہیں۔ امریکی خبر رساں ادارے ایکسیوس کی رپورٹ کے مطابق، ایک پیٹریاٹ بیٹری گزشتہ ماہ سعودی عرب میں اہم تیل کی تنصیب کے تحفظ کے لیے بھیجی گئی، جبکہ دوسری بیٹری قطر کی قدرتی گیس کی ایک بڑی اور اہم تنصیب کے دفاع کے لیے نصب کی گئی ہے۔

امریکی حکام کے مطابق اس تعیناتی کا بنیادی مقصد ایران کے ساتھ متوقع کشیدگی یا ممکنہ تنازع کی صورت میں دونوں خلیجی ممالک کی بنیادی توانائی کی تنصیبات کو حملوں سے محفوظ بنانا ہے۔ سعودی عرب اور قطر نے پہلے ہی تشویش کا اظہار کیا تھا کہ ایران کے خلاف کسی بھی ممکنہ امریکی فوجی کارروائی کی صورت میں ان کا توانائی کا انفراسٹرکچر جوابی کارروائی کا نشانہ بن سکتا ہے۔ واشنگٹن کی جانب سے میزائل ڈیفنس سسٹمز کی یہ فراہمی خلیجی ملکوں کو سیکیورٹی اور توانائی کا تحفظ فراہم کرنے کے امریکی عزم کی عکاسی کرتی ہے۔