امریکا اور ڈنمارک کی 2 نئے فوجی اڈے قائم کرنے کی منصوبہ بندی

امریکا، ڈنمارک اور گرین لینڈ کے درمیان طے پانے والے ایک نئے سیکیورٹی معاہدے کے تحت امریکا گرین لینڈ میں دو نئے فوجی اڈے قائم کرنے کا منصوبہ بنا رہا ہے۔ نیویارک میں اقوامِ متحدہ کی جنرل اسمبلی کے اجلاس کے موقع پر اس تاریخی معاہدے پر دستخط متوقع ہیں۔ ذرائع کے مطابق، ایک نیا فوجی اڈہ جنوبی گرین لینڈ کے علاقے نارسار سواک (Narsarsuaq) میں قائم کیا جائے گا، جہاں امریکا نے سرد جنگ کے دور میں ‘بلوئی ویسٹ ون’ کے نام سے اپنا ملٹری بیس بنا رکھا تھا۔ دوسرا اڈہ مشرقی گرین لینڈ کے علاقے میسٹرس وگ (Mestersvig) میں قائم ہوگا، جو اس وقت ڈنمارک کی خصوصی فورسز (سیریس ڈاگ سلیڈ پیٹرول) کے زیرِ استعمال ہے۔

یہ پیش رفت امریکی صدر ڈونلڈ ٹرمپ کی جانب سے گرین لینڈ پر امریکی کنٹرول اور سیکورٹی اختیارات کے مسلسل مطالبات اور دباؤ کے بعد سامنے آئی ہے۔ اگرچہ گرین لینڈ کے عوام کی اکثریت امریکی قبضہ یا خودمختاری میں کمی کی شدید مخالف رہی ہے، لیکن ڈنمارک اور گرین لینڈ کی حکومتوں نے واضح کیا ہے کہ اس نئے معاہدے کے ذریعے ڈنمارک کی حاکمیتِ اعلیٰ اور گرین لینڈ کے عوام کا حقِ خودارادیت مکمل طور پر محفوظ رہے گا۔ ڈنمارک کے مطابق یہ پیش رفت آرکٹک اور شمالی اٹلانٹک کے خطے میں نیٹو (NATO) کی اجتماعی دفاعی صلاحیتوں اور سیکیورٹی کو مزید استحکام فراہم کرے گی