امریکا کا ایرانی صدر کی میڈیا ٹیم کو ویزے دینے سے انکار

امریکا نے اقوام متحدہ کی جنرل اسمبلی کے اجلاس میں شرکت کے لیے نیویارک جانے والے ایرانی صدر مسعود پزشکیان کی سرکاری میڈیا ٹیم کو ویزے دینے سے انکار کر دیا ہے۔ ایرانی ذرائع ابلاغ کے مطابق ایک اعلیٰ ایرانی عہدیدار نے اس فیصلے کی تصدیق کرتے ہوئے بتایا کہ ویزوں کے اجراء سے انکار کے بعد اب ایرانی صدر کو میڈیا کوریج کرنے والے صحافیوں اور پریس ٹیم کے بغیر ہی نیویارک کا سفر کرنا پڑے گا۔

ایرانی صدر کے دفتر کے محکمۂ تعلقاتِ عامہ کے ڈائریکٹر جنرل حبیب اللّٰہ عباسی نے امریکی انتظامیہ کے اس اقدام کی شدید الفاظ میں مذمت کرتے ہوئے اسے ایک غیر سفارتی اور ‘دشمنانہ اقدام’ قرار دیا ہے۔ واضح رہے کہ اقوام متحدہ کے اجلاس سے قبل دونوں ممالک کے درمیان طویل عرصے سے جاری کشیدگی اور سفارتی پابندیوں کے باعث ویزا اجراء کا معاملہ ایک بار پھر متنازع بن گیا ہے۔