امریکا اور چین کا 30 ارب ڈالر کی اشیاء پر ٹیرف کم کرنے کا فیصلہ

امریکی صدر ڈونلڈ ٹرمپ اور چینی صدر شی جن پنگ کے درمیان ہونے والی تین روزہ اہم سربراہی ملاقات کے بعد امریکا اور چین نے تجارت اور ٹیکنالوجی کے شعبے میں بڑے پیشرفت کرتے ہوئے 30 ارب ڈالر مالیت کی اشیا پر عائد ٹیرف میں کمی اور مصنوعی ذہانت (AI) سے متعلق باقاعدہ مذاکرات شروع کرنے پر اتفاق کر لیا ہے۔

وائٹ ہاؤس کے مطابق دونوں اقتصادی قوتوں نے دونوں اطراف سے 30 ارب ڈالر مالیت کی غیر حساس اشیا کے لیے زیادہ سازگار اور لچکدار ٹیرف پالیسی اپنانے کی سفارشات پر اتفاق کیا ہے۔ اس فیصلے کے تحت امریکا سے چین برآمد ہونے والی زرعی مصنوعات، لکڑی اور کاسمیٹکس جبکہ چین سے امریکا درآمد ہونے والی چھوٹی گھریلو اشیا، کھلونے اور آرائشی سامان اس ٹیرف ریلیف کا حصہ ہوں گے۔ اس کے علاوہ، تجارتی تنازعات اور امور پر مسلسل رابطے کے لیے ایک نئی ٹریڈ کونسل قائم کرنے اور کوالالمپور میں ہونے والے سابقہ مذاکرات کے فیصلوں کو آگے بڑھانے کا بھی فیصلہ کیا گیا ہے۔

ٹیکنالوجی کے میدان میں ایک اور اہم پیشرفت کے تحت امریکا اور چین نے مصنوعی ذہانت کے فوائد اور اس کے ممکنہ خطرات پر باقاعدہ مذاکرات کا آغاز کرنے پر اتفاق کیا ہے۔ دونوں ممالک کے درمیان اس سلسلے میں آئندہ مذاکرات نومبر میں ہوں گے، جبکہ مصنوعی ذہانت سے جڑے کسی بھی ہنگامی واقعے یا خطرے سے نمٹنے کے لیے ایک خصوصی رابطہ چینل بھی قائم کیا جائے گا۔ وائٹ ہاؤس کے مطابق دونوں رہنماؤں نے اب روایتی مصنوعی ذہانت کے بجائے ’سپر انٹیلی جنس‘ کی اصطلاح استعمال کرنے پر بھی اتفاق کیا ہے جسے چین کی جانب سے بھی انتہائی اہمیت کا حامل قرار دیا گیا ہے۔

چینی وزیر خارجہ وانگ یی نے اس موقع پر اپنے تاثرات کا اظہار کرتے ہوئے کہا کہ صدر شی جن پنگ کا یہ دورۂ امریکا دونوں ممالک کے تعلقات میں ایک نیا باب کھولنے اور دوطرفہ سیاسی و معاشی روابط کو مجموعی طور پر استحکام بخشنے میں انتہائی معاون ثابت ہوگا۔ یاد رہے کہ چینی صدر شی جن پنگ اپنا تین روزہ دورہ مکمل کرنے کے بعد بیجنگ واپس پہنچ گئے ہیں۔