جنگ کیلئے تیار، جنگ بندی کے دوران صلاحیتیں مزید بہتر بنا رہے ہیں: سینٹ کام

امریکی سینٹرل کمانڈ (سینٹ کام) نے ایران کے ساتھ جاری حالیہ جنگ بندی کے دوران اپنی عسکری تیاریوں کے حوالے سے ایک اہم اور سخت بیان جاری کیا ہے۔ سینٹ کام کی جانب سے سوشل میڈیا پر جاری کردہ ایک ویڈیو پیغام میں واضح کیا گیا ہے کہ امریکی افواج جنگ کے لیے بدستور الرٹ ہیں اور اس وقفے کو اپنی آپریشنل صلاحیتوں کو مزید نکھارنے اور جدید تر بنانے کے لیے استعمال کر رہی ہیں۔

ویڈیو میں سینٹ کام کے سربراہ ایڈمرل بریڈ کوپر کو امریکی وزیرِ دفاع پیٹ ہیگستھ کے ہمراہ پریس کانفرنس کرتے ہوئے دکھایا گیا ہے۔ ایڈمرل کوپر کا کہنا ہے کہ امریکی فوج اس جنگ بندی کے دوران خود کو دوبارہ اسلحہ سے لیس (Re-arming) کر رہی ہے اور اپنی حکمت عملی کو بدلتے ہوئے حالات کے مطابق ڈھال رہی ہے تاکہ کسی بھی ہنگامی صورتحال میں فوری کارروائی کی جا سکے۔