امریکا کے وفاقی بجٹ خسارے میں ریکارڈ اضافہ

امریکہ کو شدید مالیاتی دباؤ کا سامنا ہے جہاں جولائی کے مہینے میں وفاقی بجٹ خسارہ ریکارڈ 432 ارب ڈالر کی بلند ترین سطح پر پہنچ گیا ہے۔ عالمی خبر رساں ایجنسی ’روئٹرز‘ کے مطابق جولائی کا یہ بجٹ خسارہ گزشتہ سال اسی ماہ کے مقابلے میں 48 فیصد زیادہ درج کیا گیا ہے، جس نے امریکی معیشت اور حکومتی پالیسیوں پر نئے سوالات کھڑے کر دیے ہیں۔

رپورٹ کے مطابق موجودہ مالی سال 2026 کے ابتدائی 10 ماہ کے دوران امریکی بجٹ خسارہ مجموعی طور پر 1.799 ٹریلین ڈالر تک پہنچ چکا ہے، جو گزشتہ سال کی اسی مدت کے مقابلے میں 170 ارب ڈالر یعنی 10 فیصد زیادہ ہے۔ جولائی کے دوران امریکی حکومت کے مجموعی اخراجات ریکارڈ 766 ارب ڈالر رہے، جو سالانہ بنیادوں پر 22 فیصد اضافے کو ظاہر کرتے ہیں۔ اس کے علاوہ ٹیرف ریفنڈز کی ادائیگیوں کے بعد جولائی میں امریکی کسٹمز سے خالص آمدنی منفی 8.55 ارب ڈالر ریکارڈ کی گئی۔

معاشی ماہرین کے مطابق مالی سال کے اختتام میں ابھی 2 ماہ باقی ہیں لیکن بجٹ خسارہ پہلے ہی 1.8 ٹریلین ڈالر کے قریب پہنچ چکا ہے۔ حکومتی اخراجات میں مسلسل اضافہ اور کسٹمز کی آمدنی میں ہونی والی کمی کے باعث خدشہ ظاہر کیا جا رہا ہے کہ روان مالی سال کے اختتام تک یہ خسارہ تمام تر سابقہ ریکارڈ توڑ سکتا ہے