امریکا نے ایرانی سپریم لیڈر سمیت 10 بڑے رہنماؤں کی معلومات دینے پر ایک کروڑ ڈالر انعام کا اعلان کر دیا

امریکا نے ایران کی اعلیٰ قیادت کے بارے میں معلومات فراہم کرنے والوں کے لیے بھاری انعام کا اعلان کر دیا ہے۔

امریکی محکمہ خارجہ کے انصاف کے لیے انعام پروگرام کی جانب سے جاری بیان میں کہا گیا ہے کہ ایران کے چند اہم رہنماؤں کے بارے میں قابلِ اعتماد معلومات فراہم کرنے والے افراد کو ایک کروڑ امریکی ڈالر تک انعام دیا جا سکتا ہے۔

اعلامیے کے مطابق جن شخصیات کے بارے میں معلومات طلب کی گئی ہیں ان میں ایرانی سپریم لیڈر مجتبیٰ خامنہ ای، ایرانی وزیر انٹیلی جنس اسماعیل خطیب، نائب چیف آف اسٹاف علی اصغر حجازی، میجر جنرل یحییٰ رحیم صفوی، بریگیڈیئر جنرل اسکندر مومنی اور سپریم کونسل کے سیکرٹری علی لاریجانی سمیت دیگر شخصیات شامل ہیں۔

امریکی محکمہ خارجہ کا کہنا ہے کہ ان افراد پر الزام ہے کہ یہ پاسدارانِ انقلاب کے مختلف عناصر کی قیادت اور رہنمائی کرتے ہیں جو دنیا کے مختلف حصوں میں دہشت گرد کارروائیوں کی منصوبہ بندی اور تنظیم میں ملوث ہیں۔

بیان میں مزید کہا گیا ہے کہ معلومات فراہم کرنے والے افراد کو نہ صرف مالی انعام دیا جائے گا بلکہ انہیں امریکا منتقل ہونے کی سہولت بھی فراہم کی جا سکتی ہے۔

دوسری جانب علی لاریجانی نے آج تہران میں یوم القدس کی ریلی میں شرکت کی اور اپنی موجودگی کی تصاویر بھی جاری کیں۔