ایران کے خلاف کارروائی تیز، بی ٹو بمبار طیارے حملوں کے لیے روانہ:امریکی سینٹرل کمانڈ

امریکی سینٹرل کمانڈ نے دعویٰ کیا ہے کہ بی ٹو بمبار طیارے ایران پر حملوں کے لیے روانہ کر دیے گئے ہیں۔

امریکی حکام کے مطابق اس اقدام کا مقصد ایرانی خطرے کا خاتمہ کرنا اور ایران کو دوبارہ اپنی عسکری طاقت بحال کرنے سے روکنا ہے۔

اس سے قبل امریکی وزیر دفاع پیٹے ہیگسیتھ کا کہنا تھا کہ ایرانی حکومت کے رہنما زیر زمین چلے گئے ہیں اور آج ایران پر سب سے سخت حملے کیے جائیں گے۔

انہوں نے کہا کہ امریکا اپنے حملوں سے پیچھے نہیں ہٹے گا اور آبنائے ہرمز میں جاری صورتحال پر دنیا کو زیادہ پریشان ہونے کی ضرورت نہیں۔

امریکی وزیر دفاع کے مطابق ایران پر روزانہ اوسطاً ایک ہزار سے زیادہ حملے کیے جا رہے ہیں اور یہ کارروائیاں امریکی فضائیہ اور اسرائیلی فضائیہ کی جانب سے مشترکہ طور پر انجام دی جا رہی ہیں۔

ان کا کہنا تھا کہ حالیہ حملوں کے بعد ایران کی عسکری صلاحیت نمایاں طور پر کمزور ہو چکی ہے جبکہ امریکا اور اسرائیل کا مقصد ایران کی تمام اہم فوجی صلاحیتوں کو مکمل طور پر تباہ یا غیر فعال کرنا ہے۔

انہوں نے مزید کہا کہ جلد ہی ایران کی دفاعی صنعت سے وابستہ کمپنیوں کو بھی نشانہ بنایا جائے گا۔