ایران رویہ بدلے تو مذاکرات کا دروازہ اب بھی کھلا ہے: مائیک والٹز

اقوامِ متحدہ میں امریکی سفیر مائیک والٹز (Mike Waltz) نے کہا ہے کہ اگر ایران اپنے جارحانہ رویے میں تبدیلی لائے تو اس کے ساتھ مذاکرات کے دروازے اب بھی کھلے ہیں، تاہم صدر ڈونلڈ ٹرمپ کا مقصد واضح ہے کہ ایران کو کبھی بھی جوہری ہتھیار حاصل کرنے نہیں دیے جائیں گے۔ اقوامِ متحدہ میں امریکی مندوب نے زور دے کر کہا کہ ایران کو ایٹمی طاقت بننے سے روکنے کے لیے اس پر ‘زیادہ سے زیادہ دباؤ’ (Maximum Pressure) کی پالیسی جاری رکھی جائے گی، اور واشنگٹن کسی صورت تہران کو اس بات کی اجازت نہیں دے گا کہ وہ آبنائے ہرمز جیسی اہم عالمی گزرگاہ کو بطور ہتھیار استعمال کرے۔

دوسری جانب، قطر کی وزارتِ خارجہ کے ترجمان ماجد الانصاری نے تصدیق کی ہے کہ امریکہ اور ایران کے درمیان مذاکرات کی بحالی کے لیے گزشتہ دو ہفتوں سے سفارتی رابطے اور تجاویز پر پیش رفت جاری ہے، اور اس ثالثی عمل میں پاکستان بھی اہم کردار ادا کر رہا ہے۔ قطری ترجمان کے مطابق ان کی ثالثی ٹیم تہران اور واشنگٹن دونوں کے ساتھ رابطے میں ہے اور امریکی انتظامیہ کی جانب سے یہ یقین دہانی موصول ہوئی ہے کہ واشنگٹن تہران کے ساتھ کسی حتمی اور پائیدار معاہدے تک پہنچنے میں سنجیدہ ہے۔