پاکستان میں ممکنہ مظاہروں کے پیش نظر امریکی حکومت کا اپنے شہریوں کے لیے الرٹ جاری

امریکی حکومت نے پاکستان میں موجود اپنے شہریوں کے لیے سکیورٹی الرٹ جاری کرتے ہوئے انہیں محتاط رہنے کی ہدایت کی ہے۔

اسلام آباد میں قائم امریکی سفارتخانے کے مطابق ملک میں ممکنہ مظاہروں کے باعث امریکی سفارتی عملے کی نقل و حرکت محدود کردی گئی ہے۔

سفارتخانے کے جاری کردہ بیان میں کہا گیا ہے کہ چھ مارچ کو ملک کے مختلف علاقوں میں ممکنہ احتجاج کے پیش نظر امریکی اہلکاروں کو احتیاط برتنے کی ہدایات دی گئی ہیں۔

بیان کے مطابق پاکستان میں مقیم امریکی شہری بڑے اجتماعات اور ہجوم سے دور رہیں اور غیر ضروری طور پر ایسی جگہوں پر جانے سے گریز کریں جہاں احتجاج یا ہنگامہ آرائی کا امکان ہو۔

امریکی سفارتخانے نے اپنے شہریوں کو مشورہ دیا ہے کہ وہ مقامی ذرائع ابلاغ پر نظر رکھیں اور سکیورٹی صورتحال سے باخبر رہیں۔

بیان میں یہ بھی کہا گیا ہے کہ امریکی شہری اپنی شناختی دستاویزات اپنے پاس رکھیں، غیر ضروری توجہ حاصل کرنے سے گریز کریں اور کسی بھی ہنگامی صورتحال میں مقامی سکیورٹی ہدایات پر عمل کریں۔