امریکی فوج کے ایران پر فضائی حملے، میزائل، ڈرونز اور ریڈار تنصیبات کو نشانہ بنایا

امریکی فوج نے آبنائے ہرمز کے قریب فضائی حملے کیے ہیں، جس کے بعد ایران کے ساحلی علاقے ‘سرک’ میں شدید دھماکے کی آوازیں سنی گئی ہیں۔

امریکی سینٹرل کمانڈ (سینٹ کام) کے مطابق، یہ کارروائی آبنائے ہرمز کے قریب ایرانی اہداف کو نشانہ بنا کر کی گئی، جس میں ایران کے میزائل اور ڈرون ذخائر سمیت ساحلی ریڈار تنصیبات کو نشانہ بنایا گیا۔ سینٹ کام نے موقف اختیار کیا ہے کہ یہ کارروائی 25 جون کو سنگاپور کے ایک تجارتی جہاز پر ایرانی ڈرون حملے کے جواب میں کی گئی ہے، جو کہ جنگ بندی کی کھلی خلاف ورزی تھا۔

دوسری جانب، ایرانی پاسداران انقلاب نے امریکی حملے پر سخت ردعمل دیتے ہوئے دعویٰ کیا ہے کہ انہوں نے امریکی فوج کا یہ حملہ پسپا کر دیا ہے۔ پاسداران انقلاب کا کہنا ہے کہ اس امریکی جارحیت کا جواب انتہائی تیز اور فیصلہ کن ہو گا۔