امریکا کی مشرق وسطیٰ میں اپنے شہریوں کو انخلا کیلئے تیار رہنے کی ہدایت

مشرقِ وسطیٰ میں تیزی سے بڑھتی ہوئی کشیدگی اور امن و امان کی نازک صورتحال کے پیشِ نظر امریکا نے کویت، مصر، بحرین، سعودی عرب، قطر، اردن اور متحدہ عرب امارات میں مقیم اپنے تمام شہریوں کو خطے سے نکلنے پر غور کرنے یا فوری انخلا کے لیے تیار رہنے کی سخت ہدایت کر دی ہے۔

مشرقِ وسطیٰ کے ممالک میں واقع امریکی سفارت خانوں کی جانب سے جاری کردہ تازہ ترین سفری ہدایات میں امریکی شہریوں کو انتہائی احتیاط برتنے اور چوکس رہنے کی اپیل کی گئی ہے۔ سفارت خانوں نے خبردار کیا ہے کہ خطے میں ممکنہ فضائی حدود کی عارضی بندش اور پروازوں کی اچانک منسوخی کے شدید امکانات موجود ہیں، جس کے لیے شہریوں کو قبل از وقت تیاری رکھنی چاہیے۔

امریکی حکام نے بیان میں مزید کہا ہے کہ سیکیورٹی حالات کے باعث خطے کی کئی ائیرلائنز نے اپنی پروازوں کے سابقہ شیڈول کی بحالی مؤخر کر دی ہے جبکہ متعدد نے اہم روٹس منسوخ کر دیے ہیں۔ ان نامساعد حالات کے پیشِ نظر امریکی شہریوں کو مشورہ دیا گیا ہے کہ وہ جلد از جلد اپنے ملک واپسی پر غور کریں یا حالات مزید خراب ہونے کی صورت میں ہنگامی روانگی کے لیے پروازیں دستیاب ہوتے ہی نکلنے کے لیے تیار رہیں۔