امریکا کا پہلی بار خلا میں ہتھیار تعینات کرنے کا اعتراف

امریکہ نے تاریخ میں پہلی بار خلائی مدار میں عسکری ہتھیار (Space Control Weapons) تعینات کرنے کا باضابطہ اعتراف کر لیا ہے۔ مریلینڈ میں ایئر اینڈ اسپیس فورسز ایسوسی ایشن کے اجلاس سے خطاب کرتے ہوئے امریکی فضائیہ کے سیکرٹری ٹرائے مینک (Troy Meink) نے انکشاف کیا کہ دشمن کی کسی بھی ممکنہ جارحانہ کارروائی کے خلاف امریکی افواج، سلامتی اور معاشی مفادات کے تحفظ کے لیے خلا میں ہتھیاروں کی موجودگی ناگزیر ہو چکی تھی۔ تاہم، امریکی حکام نے تعینات کردہ ہتھیار کی نوعیت اور اس کے آپریشنل طریقہ کار کی تفصیلات کو خفیہ رکھا ہے۔

امریکی اسپیس فورس کے ترجمان نے اس پیش رفت پر مزید وضاحت کرتے ہوئے کہا کہ خلا میں تعینات کی جانے والی یہ صلاحیتیں ضرورت پڑنے پر دشمن کے خلائی اثاثوں اور سیٹلائٹ سسٹمز کو مفلوج، ناکارہ یا مکمل طور پر تباہ (Kinetic & Non-kinetic) کرنے کی صلاحیت رکھتی ہیں۔ امریکی دفاعی حکام کا کہنا ہے کہ اس اقدام کا بنیادی مقصد خلا میں امریکہ کی بالادستی قائم رکھنا اور چین اور روس کی جانب سے بڑھتے ہوئے عسکری و خلائی خطرات کے خلاف اپنے سیٹلائٹس کا دفاع یقینی بنانا ہے۔

دوسری جانب، چین نے امریکہ کے اس اقدام کی شدید الفاظ میں مخالفت کرتے ہوئے واشنگٹن پر زور دیا ہے کہ وہ خلا میں اپنی عسکری طاقت بڑھانے اور جنگ کی تیاریاں فوری بند کرے۔ بیجنگ میں میڈیا بریفنگ کے دوران چینی وزارتِ خارجہ کے ترجمان گو ژیاؤکن (Guo Jiakun) نے ردِعمل دیتے ہوئے کہا کہ چین خلا کے پرامن اور محفوظ استعمال کا حامی ہے۔ انہوں نے خبردار کیا کہ خلا کو جنگی میدان بنانے کی امریکی کوششیں عالمی امن، سیکیورٹی اور تزویراتی استحکام کے لیے انتہائی خطرناک ثابت ہو سکتی ہیں۔