اپر چترال میں گلیشیائی پگھلاؤ سے سیلاب آنے کے سبب واحد رابطہ پل بہہ گیا، زمینی رابطہ منقطع

اپر چترال میں گلیشیائی پگھلاؤ (جی ایل او ایف) کے باعث ندی نالوں میں اچانک شدید طغیانی آ گئی ہے، جس سے مختلف مقامات پر سیلابی صورتحال پیدا ہو گئی اور بڑے پیمانے پر انفراسٹرکچر کو نقصان پہنچنے کی اطلاعات موصول ہوئی ہیں۔

مقامی ذرائع کے مطابق، یارخون کے علاقے بانگ گول میں اچانک آنے والے سیلاب کی وجہ سے پانی کے بہاؤ میں غیر معمولی اضافہ ہوا، جس نے رہائشی گھروں، باغات اور زرعی املاک کو شدید نقصان پہنچایا اور کئی نشیبی علاقے زیرِ آب آ گئے۔ سیلاب کے تیز بہاؤ کے باعث بانگ نالہ پر قائم واحد اہم رابطہ پل بھی دریا برد ہو گیا، جس کے نتیجے میں یارخون ویلی روڈ ہر قسم کی ٹریفک کے لیے مکمل طور پر بند ہو گئی ہے۔ پل بہہ جانے سے یارخون کی تقریباً 50 ہزار سے زائد کی آبادی کا ضلعی ہیڈکوارٹر سے زمینی رابطہ کٹ گیا ہے۔

مقامی انتظامیہ کا کہنا ہے کہ سیلاب اور لینڈ سلائیڈنگ کی وجہ سے مستوج اور بروغل روڈ بھی ہر قسم کی آمد و رفت کے لیے بند ہو چکی ہے، جس سے دور افتادہ علاقوں کے لوگوں کو شدید سفری اور غذائی مشکلات کا سامنا ہے۔ متاثرہ علاقے کے عوام نے حکومتِ خیبر پختونخوا، ضلعی انتظامیہ اور فلاحی تنظیموں سے ہنگامی بنیادوں پر امدادی کارروائیاں شروع کرنے، متبادل راستوں کی بحالی اور متاثرین کے لیے خوراک و ادویات کی فراہمی کی اپیل کی ہے۔