آبنائے ہرمز طاقت کے زور پر کھولنے سے متعلق قرار داد پر ووٹنگ منسوخ

نیویارک: اقوامِ متحدہ کی سلامتی کونسل میں آج اس وقت ایک بڑا سفارتی تعطل پیدا ہو گیا جب آبنائے ہرمز کو فوجی طاقت کے ذریعے واگزار کرانے کی قرارداد پر ووٹنگ کا عمل روک دیا گیا۔ خبر ایجنسی کے مطابق، سلامتی کونسل کے مستقل اراکین چین، روس اور فرانس نے قرارداد کے مسودے کی کھلی مخالفت کی ہے، جبکہ 10 غیر مستقل اراکین کے درمیان بھی اس حساس معاملے پر اتفاقِ رائے پیدا نہیں ہو سکا، جس کے باعث ووٹنگ کی نئی تاریخ کا اعلان بھی نہیں کیا گیا۔

یاد رہے کہ آبنائے ہرمز 28 فروری 2026 سے ہر قسم کی بحری آمد و رفت کے لیے بند ہے، جسے ایران نے اپنے ملک پر ہونے والے امریکی و اسرائیلی حملوں کے جواب میں بند کر دیا تھا۔ ایرانی وزیر خارجہ عباس عراقچی نے اس پیش رفت پر ردِعمل دیتے ہوئے واضح کیا کہ طاقت کے استعمال جیسے اقدامات صورتحال کو سلجھانے کے بجائے مزید پیچیدہ اور خطرناک بنا دیں گے۔