وزیراعظم سے انڈر 19کرکٹ ٹیم کی ملاقات، ایک ایک کروڑ روپے انعام کا اعلان

قومی انڈر 19 کرکٹ ٹیم نے ایشیا کپ میں شاندار کارکردگی کے بعد اسلام آباد میں مشترکہ پریس کانفرنس کی۔ ٹیم کے ہیڈ کوچ شاہد انور نے کہا کہ ٹیم نے ٹورنامنٹ کے لیے بہترین اور منظم تیاری کی اور پلان کے مطابق کھیل پیش کیا، جس کا نتیجہ کامیابی کی صورت میں نکلا۔

مینٹور سرفراز احمد نے بتایا کہ وزیراعظم نے کھلاڑیوں کے لیے ایک ایک کروڑ روپے کے انعام کا اعلان کیا، جس سے نوجوان کھلاڑیوں کے حوصلے بڑھے۔ انہوں نے بھارت کو شکست دینے پر ٹیم کی تعریف کی اور کہا کہ فائنل میں سمیر منہاس نے شاندار اننگز کھیلیں، جبکہ دیگر کھلاڑیوں نے بھی عمدہ کارکردگی دکھائی۔

کپتان فرحان یوسف نے کہا کہ ٹیم مینجمنٹ نے بھرپور سپورٹ فراہم کی، جس سے بہتر نتائج حاصل ہوئے، اور ٹیم ورلڈ کپ سے قبل اپنی خامیوں پر کام کرے گی۔

سمیر منہاس نے بتایا کہ ٹورنامنٹ کے دوران ٹیم نے بے خوف کرکٹ کھیلنے کی حکمت عملی اختیار کی، جو کامیابی کی بنیاد بنی۔

سرفراز احمد نے مزید کہا کہ بھارتی کھلاڑیوں کا رویہ کھیل کی روایت کے مطابق نہیں تھا، تاہم ٹیم نے ہمیشہ اسپورٹس مین اسپرٹ برقرار رکھا۔