اقوام متحدہ کا ایران امریکا تنازع کے خاتمے کیلئے مذاکرات شروع کرنے پر زور

اقوام متحدہ کے سیکرٹری جنرل انتونیو گوتریس کے ترجمان اسٹیفن ڈوجارک نے ایران اور امریکا کے درمیان جاری کشیدگی اور جنگی خدشات کے خاتمے کے لیے پاکستان کی ثالثی اور سفارتی کوششوں کا خیرمقدم کرتے ہوئے پاکستانی قیادت کا شکر یہ ادا کیا ہے۔ نیویارک میں پریس بریفنگ کے دوران اسٹیفن ڈوجارک نے کہا کہ اقوام متحدہ کی قیادت فیلڈ مارشل عاصم منیر اور وزیراعظم شہباز شریف کی خطے میں امن کے قیام کے لیے کی جانے والی کاوشوں کو قدر کی نگاہ سے دیکھتی ہے۔

ترجمان اقوام متحدہ نے زور دیتے ہوئے کہا کہ قیامِ امن کے لیے پاکستان کا کردار انتہائی کلیدی رہا ہے اور فریقین کے درمیان باضابطہ مذاکرات کا آغاز ہی ایران امریکا تنازع کے حتمی خاتمے کی راہ ہموار کرے گا۔ انہوں نے اسلام آباد میں ہونے والی امریکا ایران مفاہمت اور سفارتی پیش رفت کو ایک بڑی کامیابی قرار دیتے ہوئے اس بات پر زور دیا کہ تنازع کے پائیدار حل کے لیے بین الاقوامی سطح پر سفارتی کوششیں مسلسل جاری رہنی چاہئیں۔