اقوام متحدہ نے سعودی تنصیبات پر حملے بین الاقوامی قانون کی خلاف ورزی قرار دیدیئے

اقوام متحدہ (یو این) کے سیکرٹری جنرل انتونیو گوتریس نے سعودی عرب کے دارالحکومت ریاض میں بین الاقوامی ایئرپورٹ پر ہونے والے حوثی ملیشیا کے میزائل حملوں کی شدید ترین الفاظ میں مذمت کی ہے۔ سماجی رابطے کے پلیٹ فارم ‘ایکس’ پر جاری کردہ اپنے ایک بیان میں سیکرٹری جنرل نے حملے کے نتیجے میں ہونے والے جانی نقصان پر گہرے رنج و صدمے کا اظہار کیا ہے۔ انتونیو گوتریس نے واضح کیا کہ معصوم شہریوں اور اہم شہری تنصیبات کو جنگی یا عسکری کارروائیوں کا نشانہ بنانا بین الاقوامی انسانی قانون اور قوانینِ جنگ کی صریح خلاف ورزی ہے۔

اقوام متحدہ کے سربراہ نے حوثی ملیشیا سے دوٹوک مطالبہ کیا ہے کہ وہ اس طرح کے تمام حملے فوری طور پر بند کرے تاکہ خطے میں مزید کشیدگی اور انسانی المیے سے بچا جا سکے۔ انہوں نے تمام فریقین پر زور دیا کہ وہ زیادہ سے زیادہ تحمل کا مظاہرہ کریں اور علاقائی امن و استحکام کو خطرے میں ڈالنے والے اقدامات سے گریز کریں۔