یوکرین جنگ کے خاتمے کی پیش رفت، 20 نکاتی امریکی امن منصوبے پر اتفاق

یوکرین جنگ کے خاتمے کے لیے 20 نکاتی امریکی امن منصوبے پر اتفاق ہو گیا ہے، جبکہ یوکرین اور امریکا امن منصوبے کے حتمی مسودے کے قریب پہنچ گئے ہیں۔

یوکرینی صدر وولودیمیر زیلنسکی کی جانب سے سامنے آنے والی تفصیلات کے مطابق یوکرین 8 لاکھ اہلکاروں پر مشتمل اپنی فوج برقرار رکھے گا، جبکہ یوکرین کو دی جانے والی سیکیورٹی ضمانتیں نیٹو کے آرٹیکل 5 سے مشابہ ہوں گی۔ امن معاہدے پر دستخط کے بعد یوکرین میں انتخابات کے انعقاد اور یورپی یونین میں شمولیت کے عمل کو بھی آگے بڑھایا جائے گا۔

منصوبے کے تحت روس یوکرین کے خلاف جارحیت نہ کرنے کے وعدے پر عمل کرے گا، جبکہ مشرقی یوکرین میں موجودہ جنگی محاذوں کو ڈی فیکٹو رابطہ لائن تسلیم کیا جائے گا۔

مزید یہ کہ کیف کے کنٹرول میں موجود ڈونیٹسک کے حصوں کو غیرفوجی علاقہ قرار دے کر وہاں ایک آزاد اقتصادی زون قائم کرنے کی تجویز بھی منصوبے کا حصہ ہے۔