یوکرینی صدر زیلنسکی نے پیوٹن کی رہائش گاہ پر حملے کے الزامات کی سختی سے تردید کردی

یوکرینی صدر ولادیمیر زیلنسکی نے روس کی جانب سے لگائے گئے الزامات کی سختی سے تردید کی کہ یوکرین نے صدر ولادیمیر پیوٹن کی رہائش گاہ پر ڈرون حملے کیے۔ صدر زیلنسکی نے کہا کہ ماسکو اس طرح کے الزامات کے ذریعے امن مذاکرات کو سبوتاژ کرنے کی کوشش کر رہا ہے۔

صدر زیلنسکی نے واضح کیا کہ روس ان دعوؤں کو یوکرین پر حملے جاری رکھنے کے جواز کے طور پر استعمال کر رہا ہے اور کہا کہ روس نے ماضی میں کیف میں سرکاری عمارتوں کو نشانہ بنایا ہے۔ ان کا کہنا تھا کہ پائیدار امن کی کوششوں کو نقصان نہیں پہنچنے دینا چاہیے اور عالمی برادری کو اس پر خاموش نہیں رہنا چاہیے۔

دوسری جانب، روس نے الزام عائد کیا ہے کہ یوکرین نے نووگورود ریجن میں صدر پیوٹن کی رہائش گاہ پر حملہ کیا۔ روسی وزیر خارجہ سرگئی لاروف کے مطابق یوکرین نے 28 اور 29 دسمبر کے درمیان 91 لانگ رینج ڈرونز فائر کیے، جنہیں روسی فضائی دفاع نے مار گرایا۔ لاروف نے کہا کہ یوکرین کا یہ حملہ ریاستی دہشت گردی کے زمرے میں آتا ہے اور ایسے غیر ذمہ دارانہ اقدامات کا جواب دیا جائے گا۔