برطانیہ: سردیوں میں چوریوں میں اضافہ، انشورنس کمپنی نے شہریوں کو محتاط رہنے کی ہدایت کردی

برطانیہ کی ایک انشورنس کمپنی نے شہریوں کو خبردار کیا ہے کہ وہ خصوصاً جنوری میں اپنی قیمتی اشیا کی حفاظت کو یقینی بنائیں، کیونکہ گزشتہ پانچ برس کے اعداد و شمار کے مطابق سردیوں کی تاریک راتوں میں سونے کے زیورات، دیگر جیولری، قیمتی گھڑیاں اور ہینڈ بیگز کی چوری کی وارداتیں 10 فیصد تک بڑھ جاتی ہیں۔

الیانز یوکے کے مطابق، چوری ہونے کی صورت میں اوسط کلیم کی مالیت 8 ہزار پاؤنڈ تک ہوتی ہے، جبکہ ایک کیس میں 82 ہزار پاؤنڈ کا کلیم بھی درج ہوا تھا۔

انشورنس کمپنی نے کہا کہ حالیہ مہینوں میں سونے کی قیمت میں نمایاں اضافہ ہوا ہے، اور خاص طور پر ایشیائی کمیونٹی کے افراد سونے کو محفوظ سرمایہ سمجھتے ہیں، جس کی وجہ سے یہ چوروں کے لیے ایک پرکشش ہدف بنتا ہے۔

کمپنی نے شہریوں کو ہدایت دی کہ قیمتی اشیا کی درست قیمت پیشہ ور افراد سے لگوائیں، رسیدیں اور تصاویر محفوظ رکھیں تاکہ کسی بھی نقصان کی صورت میں کلیم آسانی سے کیا جا سکے۔

مزید برآں، رمضان کے موقع پر مسلمانوں کے گھروں میں افطار پارٹیوں اور تراویح کے سبب گھر اکثر خالی رہتے ہیں، اور گزشتہ رمضانوں میں ایسے مواقع پر سونے کی چوری کی متعدد وارداتیں ہوئی ہیں، جس پر شہریوں کو اضافی احتیاط کرنے کی ضرورت ہے۔