پاکستانی ڈیمارش پر برطانوی ہائی کمیشن کا ردعمل، قانونی کارروائی کا عندیہ

اسلام آباد: وزارت خارجہ کی جانب سے جاری کیے گئے ڈیمارش پر برطانوی ہائی کمیشن نے ردعمل دیتے ہوئے کہا ہے کہ برطانیہ میں پولیس اور پراسیکیوشن حکومت سے آزاد ہو کر کام کرتے ہیں اور ہر معاملہ قانون کے مطابق نمٹایا جاتا ہے۔

ترجمان برطانوی ہائی کمیشن کے مطابق اگر کسی غیر ملکی حکومت کو کسی ممکنہ جرم پر تحفظات ہوں تو متعلقہ شواہد پولیس لائژن افسران کو فراہم کیے جائیں۔ ترجمان نے واضح کیا کہ فراہم کیے گئے مواد کا برطانوی پولیس قانون کے مطابق جائزہ لے گی۔

برطانوی ہائی کمیشن کا کہنا ہے کہ اگر قانون شکنی سے متعلق مواد سامنے آیا تو فوجداری تحقیقات شروع کی جا سکتی ہیں، جبکہ تمام معاملات برطانوی قوانین کے تحت ہی نمٹائے جاتے ہیں۔

خیال رہے کہ اس سے قبل پاکستان نے برطانیہ کے قائم مقام ہائی کمشنر کو دفتر خارجہ طلب کر کے ڈیمارش جاری کیا تھا، جس میں برطانوی سرزمین سے دی جانے والی دھمکیوں اور احتجاج میں ملوث عناصر کے خلاف کارروائی کا مطالبہ کیا گیا تھا۔