برطانیہ: 600 پناہ گزینوں کو فوجی کیمپ منتقل کرنے کے اعلان پر احتجاج

برطانیہ کے مشرقی سسیکس کے ایک قصبے میں اُس وقت عوامی غم و غصہ سامنے آیا جب حکومت نے تقریباً 600 سیاسی پناہ کے متلاشی افراد کو ایک فوجی ٹریننگ کیمپ میں منتقل کرنے کا منصوبہ ظاہر کیا۔ اس اعلان کے بعد علاقے میں منظم اور پُرامن احتجاجی مظاہرہ کیا گیا۔

برطانوی میڈیا کے مطابق حکومت نے اکتوبر میں کروبورو کے مضافاتی علاقے میں واقع فوجی مقام کو پناہ گزینوں کی عارضی رہائش کے طور پر استعمال کرنے کا فیصلہ کیا تھا، جس پر مقامی آبادی نے سخت تحفظات کا اظہار کیا۔

ہوم آفس کے ترجمان نے بتایا کہ پناہ گزینوں کو فوجی مقامات پر منتقل کرنا اُن اقدامات میں شامل ہے جن کا مقصد ہوٹلوں کو بطور رہائش استعمال کرنے کی پالیسی کا خاتمہ ہے۔ ترجمان کے مطابق حکومت انتخابات سے قبل اس منصوبے کو عملی جامہ پہنانے کے لیے مقامی حکام، کمیونٹی اور پراپرٹی پارٹنرز کے ساتھ قریبی تعاون کر رہی ہے۔

انہوں نے کہا کہ پناہ گزینوں کی رہائش کے لیے ہوٹلوں کے متبادل انتظامات پر مرحلہ وار پیش رفت جاری ہے، اور کروبورو کا فوجی کیمپ اسی حکومتی پالیسی کا حصہ ہے۔