مشرق وسطیٰ کشیدگی: برطانیہ نے امریکا کو فوجی اڈوں کے استعمال کی اجازت دے دی

لندن: مشرق وسطیٰ میں بڑھتی کشیدگی کے تناظر میں برطانیہ نے امریکا کو اپنے فوجی اڈے استعمال کرنے کی اجازت دے دی ہے۔

برطانوی وزیرِاعظم کیئر اسٹارمر نے بیان میں کہا کہ امریکا نے فوجی اڈوں کے استعمال کے لیے باقاعدہ درخواست کی تھی، جسے قبول کر لیا گیا ہے۔ ان کے مطابق یہ اجازت ایران کے خلاف دفاعی کارروائیوں کے تناظر میں دی گئی ہے۔

انہوں نے کہا کہ یہ فیصلہ ایران کو خطے میں میزائل داغنے سے روکنے، معصوم شہریوں کی جانوں کے تحفظ اور برطانوی شہریوں کو خطرات سے بچانے کے لیے کیا گیا۔ ان کا کہنا تھا کہ ایسے ممالک کو بھی محفوظ رکھنا ضروری ہے جو اس تنازع میں براہِ راست شامل نہیں۔

کیئر اسٹارمر نے مزید کہا کہ خلیجی شراکت دار دفاعی تعاون کا مطالبہ کر رہے ہیں اور برطانوی جانوں کا تحفظ حکومت کی اولین ذمہ داری ہے۔ انہوں نے بتایا کہ برطانوی طیارے دفاعی کارروائیوں کے لیے فضا میں موجود ہیں اور ایرانی حملوں کو روکنے میں کردار ادا کر رہے ہیں۔