یو اے ای کے صدر شیخ محمد بن زاید آج پاکستان پہنچیں گے، اسلام آباد میں عام تعطیل کا اعلان

وزیراعظم شہباز شریف کی دعوت پر متحدہ عرب امارات کے صدر شیخ محمد بن زاید النہیان آج سرکاری دورے پر پاکستان پہنچیں گے۔ دورے کے دوران معزز مہمان کی صدرِ مملکت آصف علی زرداری، وزیراعظم شہباز شریف اور دیگر اعلیٰ حکومتی شخصیات سے اہم ملاقاتیں شیڈول ہیں۔

ترجمان دفتر خارجہ کے مطابق یو اے ای کے صدر کا یہ دورہ دوطرفہ تجارت، سرمایہ کاری، توانائی اور ترقیاتی شعبوں میں تعاون کو مزید فروغ دینے میں معاون ثابت ہوگا، جب کہ دونوں ممالک کے تعلقات کو نئی جہت ملنے کی توقع ہے۔

صدر متحدہ عرب امارات کے دورۂ پاکستان کے پیش نظر اسلام آباد میں عام تعطیل کا اعلان کردیا گیا ہے۔ نوٹیفکیشن کے مطابق پاکستان سیکرٹریٹ اور وفاقی دارالحکومت میں واقع تمام وفاقی ادارے آج بند رہیں گے۔

اعلان کے تحت سینیٹ سیکرٹریٹ اور قومی اسمبلی سیکرٹریٹ بھی آج بند رہیں گے، جبکہ اسلام آباد ہائیکورٹ اور اسلام آباد ڈسٹرکٹ کورٹس میں بھی 26 دسمبر کو چھٹی ہوگی۔ رجسٹرار اسلام آباد ہائیکورٹ کی جانب سے اس حوالے سے باقاعدہ نوٹیفکیشن جاری کردیا گیا ہے۔

وفاقی آئینی عدالت کے رجسٹرار نے بھی آج کی کاز لسٹ منسوخ کرتے ہوئے عام تعطیل کا نوٹیفکیشن جاری کردیا ہے۔

تاہم کابینہ ڈویژن کے مطابق اسلام آباد کے اسپتال، بینک، ضروری سروسز کے دفاتر، میٹروپولیٹن کارپوریشن، سی ڈی اے، اسلام آباد انتظامیہ، پولیس، آئیسکو اور سوئی ناردرن گیس کے دفاتر معمول کے مطابق کھلے رہیں گے۔