سالِ نو کا تحفہ: متحدہ عرب امارات میں نجی شعبے کیلئے کم از کم تنخواہ میں بڑا اضافہ

متحدہ عرب امارات نے سالِ نو کے موقع پر نجی شعبے میں کام کرنے والے اماراتی ملازمین کے لیے تنخواہوں میں نمایاں اضافہ کرتے ہوئے کم از کم اجرت کی نئی حد مقرر کر دی ہے۔

عرب میڈیا کے مطابق وزارتِ انسانی وسائل و اماراتائزیشن (MOHRE) نے اعلان کیا ہے کہ یکم جنوری 2026 سے نجی شعبے میں کام کرنے والے اماراتی شہریوں کی کم از کم تنخواہ 6,000 درہم ہوگی۔

وزارت کے بیان کے مطابق یہ شرط شہری ورک پرمٹ کے اجرا، تجدید یا ترمیم کی تمام درخواستوں پر لاگو ہوگی۔ کم از کم تنخواہ کا یہ اصول صرف دو سالہ ورک پرمٹس پر نافذ ہوگا، خواہ وہ نئے ہوں، تجدید کے مراحل میں ہوں یا ترمیم کے تحت جاری کیے جائیں۔

اعلامیے میں واضح کیا گیا ہے کہ مقررہ تاریخ کے بعد کوئی بھی آجر شہری ورک پرمٹ کے لیے درخواست نہیں دے سکے گا اگر درج شدہ تنخواہ 6,000 درہم سے کم ہو۔ اگر کوئی آجر 30 جون 2026 تک تنخواہ درست نہیں کرتا تو یکم جولائی 2026 سے اس کے خلاف تادیبی کارروائی عمل میں لائی جائے گی۔

تادیبی اقدامات میں ایسی کمپنیوں پر پابندیاں عائد کرنا بھی شامل ہے جو اماراتی شہریوں کو مقررہ کم از کم تنخواہ سے کم ادائیگی کریں گی۔

واضح رہے کہ اس سے قبل یکم جنوری 2025 سے اماراتیوں کی کم از کم تنخواہ 5,000 درہم مقرر کی گئی تھی۔ یہ نیا فیصلہ نجی شعبے میں اماراتی شہریوں کے حقوق کے تحفظ اور معیاری اجرت کو یقینی بنانے کے لیے کیا گیا ہے۔