دبئی کا نیا آن لائن سسٹم، ٹریول بین ہٹانے کا عمل اب تیز اور آسان

متحدہ عرب امارات نے اپنے شہریوں اور مقیم افراد کے لیے ایک جدید آن لائن نظام متعارف کرا دیا ہے، جس کے ذریعے ٹریول بین (سفر پر پابندی) کی جانچ اور اسے ختم کرنے کا عمل مزید تیز اور آسان ہو گیا ہے۔

یو اے ای کے ایک نجی خبر رساں ادارے کی رپورٹ کے مطابق دبئی کے حکام نے یہ سروس آن لائن فراہم کر دی ہے، جس کے تحت رہائشی اب گھر بیٹھے کسی بھی وقت اپنی ٹریول بین کی صورتحال چیک کر سکتے ہیں اور پابندی ختم ہونے کی صورت میں متعلقہ خدمات سے فائدہ اٹھا سکتے ہیں۔

نئے سسٹم میں صارفین کو اپنا اماراتی شناختی کارڈ نمبر یا دیگر مطلوبہ معلومات درج کرنا ہوتی ہیں، جس کے بعد سسٹم فوری طور پر ٹریول بین کی موجودگی یا خاتمے کے بارے میں اپ ڈیٹ فراہم کرتا ہے۔

ماہرین کے مطابق اس ڈیجیٹل طریقہ کار سے پرانے روایتی نظام کے مقابلے میں نمایاں بہتری آئی ہے، کیونکہ اس سے لوگوں کو سرکاری دفاتر کے چکر لگانے اور طویل انتظار سے نجات مل گئی ہے۔

یہ سہولت خاص طور پر ان افراد کے لیے فائدہ مند ثابت ہو گی جو آئندہ دنوں میں سفر کی منصوبہ بندی کر رہے ہیں۔