متحدہ عرب امارات میں پیٹرول کی قیمتوں میں اضافہ کردیا گیا

دبئی: متحدہ عرب امارات کی فیول پرائس کمیٹی نے جون کے مہینے کے لیے پیٹرول اور ڈیزل کی نئی قیمتوں کا اعلان کر دیا ہے، جس کے مطابق پیٹرول کی مختلف اقسام کی قیمتوں میں اضافہ جبکہ ڈیزل کی قیمت میں کمی کی گئی ہے۔

اعلان کے مطابق سپر 98 پیٹرول کی قیمت 3.66 درہم سے بڑھا کر 3.95 درہم فی لیٹر مقرر کر دی گئی ہے۔

اسی طرح اسپیشل 95 پیٹرول کی نئی قیمت 3.83 درہم فی لیٹر مقرر کی گئی ہے، جو مئی میں 3.55 درہم فی لیٹر تھی۔

ای پلس پیٹرول کی قیمت میں بھی اضافہ کیا گیا ہے، جو اب 3.76 درہم فی لیٹر ہو گئی ہے، جبکہ گزشتہ ماہ یہ 3.48 درہم فی لیٹر تھی۔

دوسری جانب ڈیزل صارفین کے لیے ریلیف دیتے ہوئے اس کی قیمت 4.69 درہم سے کم کر کے 4.33 درہم فی لیٹر مقرر کر دی گئی ہے۔

نئی قیمتوں کا اطلاق یکم جون سے ہو گیا ہے، جس کے بعد ملک بھر میں ایندھن کی فروخت نئے نرخوں کے مطابق کی جا رہی ہے۔